තොටුපොළ කඳු තරණය....

සෑහෙන කාලයක් තිස්සේ පෙරුම් පුරාගෙන ඉඳපු ගමනක් යන්න පහුගිය සතියේ අවස්ථාව උදා වුණා. ලංකාවේ තුන්වෙනියට උසම කන්ද වන තොටුපොළ කන්ද තරණය කරන්න අපට හැකි වුණා. මේ ඒ පිළිබඳව ඔබට ගෙන එන සටහනයි.
තොටුපොළ කන්ද පිහිටා තිබෙන්නේ පට්ටිපොළ සිට හෝර්ටන් තැන්නට පිවිසෙන මාර්ගයේ. හෝර්ටන් තැන්නේ පට්ටිපොළ අන්තයේ ප්‍රවේශපත්‍ර කවුළුව පසුකර මීටර් කීපයක් ඉදිරියට යනවිට මාර්ගයේ වම් අත පැත්තේ තොටුපොළ කන්දට පිවිසෙන මංපෙත මුණගැහෙනවා. මුහුදු මට්ටමේ සිට මීටර් 2360ක් පමණ උසින් පිහිටා ඇති තොටුපොළ කන්ද ඊටම ආවේණික ජෛවීය හා භූගෝලීය ලක්ෂණ වලින් හෙබි ඉතාම අපූර්ව පාරිසරික පද්ධතියක්.
මා සමග මේ ගමන යන්නට මගේ කාර්යාලීය මිතුරන් තිදෙනෙකුත් එකතු වුණා. ජුලි මස 25 වැනිදා රාත්‍රී 8ට කොළඹ කොටුවෙන් පිටත් වන තැපැල් දුම්රියේ නිදන මැදිරිය වෙන් කරගත් අපි 26වනදා උදේ පාන්දර 4.30ට පමණ ලේ කැටි ගැස්වෙන තරම් සීතලකුත් තුරුළු කරගෙන පට්ටිපොළට ගොඩ බැස්සා. 

සීතල උදෑසන පට්ටිපොළ දුම්රිය පොළ...

දැඩි සුළඟ හා අධික සීතල නිසා මදක් එළිය වැටෙන තුරු දුම්රිය ස්ථානයේ විවේක කාමරයේ රැඳෙන්නට අපි තීරණය කළා. මා දුටු ඉතාම පිරිසිදු විවේක කාමරය ලෙස පට්ටිපොළ දුම්රිය ස්ථානයේ විවේක කාමරය හඳුන්වන්නට පුළුවන්. ඒ පිළිබඳව දුම්රිය ස්ථාන බලධාරීන්ට පින් දෙමින් පැය දෙකක් පමණ එහි ගතකල අපි ඉන්පසු නගරය වෙත ගමන් කළේ උදෑසන ආහාරය ලබාගැනීම සඳහායි.

රොටී....

 සරල උදේ ආහාරයෙන් පසු අපි ගමන් කළේ අප විසින් කල් වේලා ඇතුව වෙන් කරගෙන තිබුණු අපගේ නවාතැන් පොළ වන වන සංරක්ෂණ දෙපාර්තමේන්තුවේ නිවාඩු නිකේතනය වෙතටයි. සරල සාමාන්‍ය පහසුකම් වලින් හෙබි පැරණි ගොඩනැගිල්ලක් වන එය අපගේ අවශ්‍යතාව වෙනුවෙන් මනාව ගැලපුනා.

වන සංරක්ෂණ දෙපාර්තමේන්තුවේ පට්ටිපොළ සංචාරක බංගලාව...

 අප ගෙන ආ බඩුමුට්ටු එහි තැබූ අප සංචාරයට සුදුසු ඇඳුමින් සැරසුණා. ඒවන විටත් සුළං ධාරා සමග සිහින් වැසි ඇද හැලෙමින් තිබුණු නිසා අපගේ කැමරා උපකරණවල ආරක්ෂාව ගැන විශේෂ අවධානයක් යොමු කරන්නට අපට සිදු වුණා. ඉතින් එතැන් පටන් හෝර්ටන් තැන්න පිවිසුම තෙක් අපට ගමන් කරන්නට සිද්ද වුණේ මීදුම හා සිහින් වර්ෂාව මධ්‍යයේයි. ඒ පිළිබඳව පුන පුනා නොකියා මෙතැන් සිට ඡායාරූප වලට කතා කරන්නට ඉඩ හරින්නම්.

පටන් ගැන්ම.....

මග දිගට.....

අහෝ..! අපේ වගකිවයුතු සංචරණය.....(අඹේවෙල යෝගට් කෝප්ප)

මීදුම මැදින්....

අනන්තයට යන පාර දිගේ.....

වනමලක සුන්දරත්වය... 

ගල මත ජීවය....

බෝවිටියා...

මේ විදිහට මග දිගට සුන්දරත්වය විඳිමින් සීතල සුළඟට වෙවුලමින්, මද වැස්සට තෙමෙමින් අපි හෝර්ටන් තැන්නේ පට්ටිපොළ පිවිසුමට ලං වුනා. ඒ වෙනකොට මීදුම කොයිතරම්ද කියලා මේ ඡායාරූපයෙන් බලාගන්න.

එතැන් පටන් මීදුම මැද්දෙන් තොටුපොළ කන්ද නැගපු හැටි හැකි ඉක්මණින් ලියන්නම්.

යතුරුපැදි චාරිකා අංක හතර: හෝර්ටන් තැන්න

මේ චාරිකා සටහනේ සෙසු කොටස් මෙතනින් බලන්න.
1 කොටස 
2 කොටස 
3 කොටස 
හෝර්ටන් තැන්නට ඇතුළු වෙනකොටම අපි දැක්කේ සුබදායක දර්ශන නම් නෙවෙයි. බැලු බැලූ හැම තැනම ආක්‍රමණික ශාක වර්ග පිරිලා. කලින් පෝස්ට් එකේ මම ඒවගේ ශාක වර්ග දෙකක් සඳහන් කළා. මේ තියෙන්නෙත් ඒ වගේ ආක්‍රමණික ශාකයක්.

වරල්ල - Pteridium

මේ ශාකය හැඳින්වෙන්නේ 'වරල්ල' (Pteridium) යන නමින්. අපිට හුරුපුරුදු මීවන ශාකයක් වගේ පෙනුණත් මේක ඊට වඩා හුඟක් ඉක්මණට පැතිරී යන පර්ණාංග විශේෂයක්. වනෝද්‍යානයේ ටිකට් පරීක්ෂා කරන ස්ථානය අවට මේ ශාක විශාල පැතිරීමක් දකින්න තිබුණා. 
මේ අසුබ දර්ශන මැදින් වුණත් හෝර්ටන් තැන්න තමන්ගේ සුන්දර රූපකාය ඇතැම් විට මීදුම් සළුවෙන් වසා ගනිමින්ද ඇතැම් විට යන්තම් නිරාවරණය කරමින්ද අපිට පෙන්නුවා. අඩිපාර දිගේ හෙමින් ඇවිද ගිය අපි රතු පාලම ළඟ මදක් නතර වුණා.

මිරිදිය කකුළු විශේෂයක් 

මේ පුංචි මිරිදිය කකුළු විශේෂය අපිට දකින්න ලැබුනේ රතුපාලම අසල කුඩා දියදහර දෙස විමසිලිමත්ව බැලූ නිසයි.
HSBC බැංකුව විසින් හෝර්ටන් තැන්න පුරාම දැනුවත් කිරීමේ පුවරු සවි කර තිබෙනවා. ඇත්ත වශයෙන්ම ඒවායේ සඳහන් කරුණු ඉතාමත් ප්‍රයෝජනවත්. හෝර්ටන් තැන්නේ දියදහරා වලට හඳුන්වා දෙනු ලැබූ රේන්බෝ ට්‍රවුට් මත්ස්‍යයා ගැන මා දැන ගත්තේ එවන් පුවරුවකට පින් සිද්ද වෙන්නටයි. ඊට අනුව මේ දියදහරා වලට එම මත්ස්‍යයා හඳුන්වාදෙනු ලැබ ඇත්තේ Ceylon Fishing Club නමැති සංගමය විසින් විනෝදයට මාළු බෑම සඳහායි. නමුත් අද වන විට හෝර්ටන් තැන්නේ දියදහරා පුරා විසිර ගිය ට්‍රවුට් මාළුවා දේශීය කූනිස්සන් විශේෂ හෝර්ටන් තැන්නෙන් අතුගා දමන්නට සමත් වී සිටිනවා. 

ට්‍රවුට් මත්ස්‍යයාගේ විස්තර...

මෙවන් පරිසරයක චාරිකාවක් සිදුකරද්දී ඉතා විමසිලිමත්ව ගමන් කිරීම අත්‍යවශ්‍යයි. නැත්නම් බොහෝ වැදගත් කුඩා දේවල් ඔබ අතින් මග හැරෙන්නට පුළුවනි. මේ බලන්න මේ පින්තූරය...

ලයිකන...

මේ තියෙන්නේ ගලක් මත වැවුණු ලයිකනයක්. ඇල්ගී හා දිලීරයක සහජීවී සංගමයක් ලයිකනයක් ලෙසින් හැඳින්වෙනවා. ලයිකන වල ඇති තවත් සුවිශේෂ ලක්ෂණයක් වන්නේ ඒවා පාරිසරික තත්ත්වය මැනීමේ දර්ශකයක් ලෙස යොදා ගැනීමයි.  එනම් යම් පරිසරයක ලයිකන වැඩී නැතිනම් එම පරිසරයේ වායු දූෂණය ඉහළ බවයි සැලකෙන්නේ.
මෙහෙම මදක් ඉදිරියට යද්දී අපි තවත් සුවිශේෂ සත්ත්වයෙක් දැක ගත්තා.

කළු කොපුල් කටුස්සා - Calotes nigrilabris

කළු කොපුල් කටුස්සා - Black-cheek Lizard (Calotes nigrilabris Peters) නමින් හැඳින්වෙන මෙයා අපිටම ආවේණික කටුසු විශේෂයක්. ඉහළ කඳුකරයේ ජීවත් වෙන මෙයා හෝර්ටන් තැන්නේ සුලබව දැකබලා ගන්න පුළුවන්.
ශ්‍රී ලංකාවට ආවේනික ශාක වර්ග රාශියක් විමසිල්ලෙන් බැලුවොත් ඉතා පහසුවෙන් හඳුනා ගන්න පුළුවන්. මේ තියෙන්නෙත් අපිටම ආවේනික ශාකයක්...

කුරු උණ - Chimonobambusa densifolia

මේ ශාකය හැඳින්වෙන්නේ කුරු උණ-Dwarf bamboo (Chimonobambusa densifolia) යන නමින්. ඉහළ කඳුකර ප්‍රදේශ වල ව්‍යාප්ත වී ඇති මේ ශාකයේ හොඳ ගහනයක් චිමිනි පොකුණ ආශ්‍රිතව අපි නිරීක්ෂණය කළා.

චිමිනි පොකුණ 

මේ තියෙන්නේ චිමිනි පොකුණ. මේක වටේම කුරු උණ ශාක පිරිලා තිබුණා. ඔය ඉදිරිපසින් පෙනෙන්නේ මහා රත්මල් ශාකයක්. මෙන්න මහරත්මල් වල සමීප රූපයක්.

මහරත්මල්-Rhodrodendron arboreum

මධ්‍යම පළාත් පුෂ්පය ලෙසද නම් කර ඇති මහරත්මල (Rhodrodendron arboreum) ඒක දේශීය ශාකයක්. ඉහළ කඳුකර ප්‍රදේශ වල පමණක් දැකගත හැකි මෙම ශාකය මලින් බරවූ විට ඉතාම මනස්කාන්ත දර්ශනයක් මවනවා. 
කුඩා තණ පඳුරු අතර සැඟවී තිබුණු හුරුපුරුදු සුන්දර ශාකයක් දැකලා අපි ටිකක් නතර වුණා. මෙයා මීට කලින් සිංහරාජ අඩවියේ ලංකාගම පාර අයිනක ඉඳලත් මට හම්බ වුණු කෙනෙක්. මේ ඉන්නේ එයා...

නිල්බිනර - Exacum trinervium

මේ නිල්බිනර (Exacum trinervium) ශාකයක්. මල නම් ටිකක් පරවෙලා. ලංකාවට ආවේනික අතිශය සුන්දර පැලෑටියක්. බොහෝ විදේශිකයන්ගේ කෑදර බැල්මට ලක්වුණු මෙම ශාකය ජාන හොරුන්ගෙන් බේරා ගැනීම විශාල අභියෝගයක්.
සුප්‍රකට ලෝකාන්තය දක්වා දිවෙන ඛාදනය වුණු අඩිපාරේදී තමයි මට මේ ඒකදේශීය සමනලයා මුණ ගැහුනේ.

ලංකා කොටිතියා - Ceylon tiger

තරමක් දුර්ලභ විශේෂයක් වන මෙයා ලංකා කොටිතියා - Ceylon tiger (Parantica taprobana) නමින් හැඳින්වෙනවා. මෙයා ගැන මම මීට කලින් ලියූ සටහන මෙතනින් බලන්න. 
මේ විදිහට ඉතා සෙමින් අවට බල බලා ගිය අපි ලෝකාන්තයත් දැක බලා ගත්තා.

මිනිස් ක්‍රියාකාරකම් නිසා මේ වටිනා පරිසර පද්ධතියට එල්ල වුණු තර්ජන ගණනාවක් අපි මේ චාරිකාවේදී නිරීක්ෂණය කළා. ආක්‍රමණික ශාක වලින් හා සත්ත්ව විශේෂ වලින් එල්ල වුණු තර්ජනය ඉන් ප්‍රධානයි. ඒවගේම සංචාරකයන් සිදුකරන නොමනා ක්‍රියා නිසා ඇති වන පාරිසරික ගැටලුත් සුළුපටු නැහැ. තමන්ට නියමිත වනමං(Trails) වල පමණක් ගමන් කරන්න කියලා කොයිතරම් අවවාද කලත් බොහෝ  අය නියමිත මගින් පිට පැන තැන්න හරහා ගමන් කරනවා. මේ බලන්න...

හරිමග...

ඔය පින්තූරේ කහපාටින් පෙනෙන්නේ නියමිත මාර්ගය (ඔය පොඩි දරුවා යනමග නිවැරදියි.) ඊට ඉහළින් දුඹුරු පාටින් පෙනෙන්නේ සංචාරකයන් විසින් බොහෝ වාරයක් තිස්සේ ගමන් කිරීමෙන් සැදුණු පාරවල් තුනක්. ඉතිං අර නිල්බිනර වගේ පුංචි පැළෑටි ඉතිරි වෙයිද?
හෝර්ටන් තැන්නේ සුවිශේෂත්වයත්, එම පරිසර පද්ධතිය තුළ හැසිරිය යුතු ආකාරයත් පුන පුනා කීම අනවශ්‍ය දෙයක්. වගකීමෙන් හා වගවීමෙන් හැසිරීම ඔබට බාරයි.....
මෝටර් සයිකල් චාරිකාවේ අවසාන කොටසින් රක්වාන සූරියකන්ද වංගු දහය පාරේ සුන්දරත්වය බලාපොරොත්තු වන්න.

කාරුණික නිවේදනයයි: මේ සමග පලවන සියලු ඡායාරූප මා හා මගේ බිරිඳ විසින් ගන්නා ලද ඒවාය. කොහෙන්වත් උපුටා ගත් එකදු ඡායාරූපයක් මගේ බ්ලොග් එකේ කිසිදු තැනක නැත. යම් අයෙකු කිසියම් උවමනාවකට ඡායාරූපයක් උපුටා ගත්තාට මගේ කිසිම අමනාපයක්  නැත. ඇත්ත වශයෙන්ම එය මගේ මහත් සතුටටද හේතු වෙයි. නමුත් මේ ඡායාරූප වල මා ගසා ඇති හංවඩුව ඉවත් කිරීමෙන් වලකින්න.

යතුරුපැදි චාරිකා - නුවරඑළිය අංක 3

මේ ලිපි මාලාවේ පළමු කොටස මෙතනිනුත්,
දෙවැනි කොටස මෙතනිනුත් බලන්න.
පසුදා උදෑසනින්ම අවදි වුණු අපි දෙන්නා මුලින්ම ගියේ නුවරඑළිය නගර මධ්‍යයේ පිහිටි අපේ ප්‍රියතම වෙජිටේරියන් හෝටලය වන ශ්‍රී අම්බාල්ස් එකට. බඩ පිරෙන්න තෝසේ, වඩේ වලින් සප්පායම් වුණු අපි  වඩේ කීපයක් පාර්සල් කරගත්තා. අපි ළඟ තිබුණු පුංචි උණුවතුර බෝතලේ වේටර්ට දුන්නු මම "මල්ලි තේ හතරක් දාන්න හැබැයි අඩු සීනි" කියලා කිව්වා. මේකා කැඩිච්ච සිංහලෙන් මගෙන් අහනවා "අයියේ තේ හතරම අඩු සීනිද කියලා" හයියෝ සල්ලි..
මහගස්තොට, බ්ලැක්පූල්, මීපිලිමාන හරහා අපි කන්දේ ඇලට ලඟා වුණා. කන්දේ ඇල ජලාශයේ ඒ වන විට ඉතිරි වෙලා තිබුණේ බොහොම අඩු ජල ප්‍රමාණයක්. ඒ වන විට මාස ගණනකින් නුවරඑළියට වැහි පොදක් වැටිල තිබුනේ නෑ.

දිය සිඳුණු ජලාශය 

හෝර්ටන් තැන්න ජාතික උද්‍යානය අපේ ප්‍රමුඛ අරමුණ වෙලා තිබුණු නිසා අපි කන්දේ ඇල නවතින්න අදහස් කලේ නෑ. එනගමන් කාලවේලාව ඉතිරි වෙලා තිබුනොත් එමු කියලා හිතා ගෙන අපි දිගටම ගමන් කළා. මේ විදිහට කිලෝමීටර් කීපයක් ආපු අපි මද විවේකයක් සඳහා අඹේවෙල ප්‍රදේශයේ මදකට නතර වුණා.

සුන්දර අඹේවෙල.....

මේත් අඹේවෙලමයි...

අඹේවෙල පසුකරගෙන පට්ටිපොළ හරහා අපි හෝර්ටන් තැන්නට ඇතුළු වුණා. ඒ යන අතරමග මාර්ගයේ සුන්දරත්වය තමයි මේ.

ස්වර්ගයට යන මාර්ගය...

මේ සුන්දරත්වය විඳිමින් අපි ගමන් කලේ ඉතාම අඩු වේගයකින්. (බලන්න මගේ මීටරේ දිහා...) මේ මාර්ගයේ ගමන් කරද්දී අපි බොහොම සිත් කම්පා කරවන දසුනක් දැක්කා. එනම්, Blue star (Aristea acklonii) නමින් හැඳින්වෙන ඉතා ඉක්මනින් පැතිරී යන ආක්‍රමණික ශාකයක් මේ ප්‍රදේශයේ ව්‍යාප්තව තිබෙනු දැකීමයි. අඹේවෙල ප්‍රදේශයේ සිට හෝර්ටන් තැන්න දක්වාම මග දෙපස දිගටම මෙම ශාකය අප විසින් නිරීක්ෂණය කළා.

Blue star - විනාශකාරී සුන්දරත්වය  

දීප්තිමත් සුන්දර මල් වලින් ගැවසුණු මෙම ශාකය විසිතුරු ශාකයක් ලෙසට ගෙවතු සඳහා හඳුන්වාදුන් එකක්. ස්වභාවික පරිසරයට නිදහස් වූ මේ ශාකය දැන් ඉහළ කඳුකරයේ ඉතා විනාශකාරී ලෙස පැතිරෙමින් පවතිනවා. මෙය දකුණු හා නැගෙනහිර අප්‍රිකානු රටවලින් ශ්‍රී ලංකාවට හඳුන්වාදුන් ශාකයක් බව පාරිසරික නීතිවේදී ජගත් ගුණවර්ධන මහතා එතුමාගේ ෆේස්බුක් අඩවියේ සටහන් කොට තිබුණා.
මේ විදිහට අවට පරිසරය ගැන විමසිලිමත් වෙමින් හෙමින් හෙමින් අපි හෝර්ටන් තැන්නට ළඟා වුණා.

තව ටිකයි.....

වනෝද්‍යානයට ඇතුළු වීමට ඇති ප්‍රවේශ මාර්ගයේ මද දුරක් යද්දී ඈතින් සමනළ කන්ද දැක ගැනීමට අපි පිං කර තිබුණා.

සිරිපාදේ සමනොළ කන්ද පෙනේ...

වනෝද්‍යාන පිවිසුම් මාර්ගයේ තවත් සුන්දර දර්ශනයක්...

 අනන්තයට යන පාර දිගේ...

හෝර්ටන් තැන්නට ඇතුළු වුණු හැටියෙමත් අපි දුටුවේ සුබදායක දසුනක් නම් නෙවෙයි. යුලෙක්ස් හෙවත් යුරෝපීය කටුපඳුරු (Ulex europeous)ලෙස හැඳින්වෙන ආක්‍රමණික ශාකයක් මේ වටිනා ජෛව සම්පත ගිලගනිමින් සිටිනා ආකාරයයි. අඩිපාර දෙපස ඝනව වැඩුණු යුලෙක්ස් පඳුරු...

ඝනව වැඩුණු ulex පඳුරු  

කහ පැහැ මලින් පිරුණු මෙම ශාකයත් විසිතුරු ශාකයක් ලෙස මෙරටට ගෙන්වූවක් ලෙසටයි සැලකෙන්නේ. හෝර්ටන් තැන්නේදී අපි විඳපු සුන්දරත්වයත් ලබාගත් සුවිශේෂ ඡායාරූපත් ඊළඟ ලිපියෙන් ගෙන එන්නම්. 

යතුරුපැදි චාරිකා: නුවරඑළිය - අංක 2

ගියවර මම සටහන අවසාන කලේ නොර්ටන් බ්‍රිජ් නගරයෙන්. ඒ සටහන් කියවන්න බැරි වුණා නම් මෙතනින් ගිහින් ඒක බලලා එන්න.

නොර්ටන් බ්‍රිජ්හි සුප්‍රකට මං සලකුණ - සප්ත කන්‍යා කඳුවැටියේ හැපී විනාශ වුණු මාර්ටින් එයාර් ගුවන් යානයේ ටයරය 

නොර්ටන් බ්‍රිජ් නගරයේ මදක් නතර වුණු අපි අසල තිබුණු තේ කඩයකට ගොඩ වුණේ ඒ වන විට අපට තරමක් වෙහෙස දැනුණ නිසාවෙන්. අතින් කටින් බඩු එල්ලගෙන, කන්නාඩි, ජැකට් දාගෙන අඟහරු ලෝකෙන් ආපු අමුතු ජීවීන් දෙන්නෙක් වගේ අපි දෙන්නව කඩේ හිටපු උදවියට පේන්න ඇති. ඔයගොල්ලෝ කොහේ ඉඳන්ද? කියලා අහපු වයසක මනුස්සයෙකුට "හික්කඩුවේ ඉඳන්" කියලා මම උත්තර දුන්නම ඒ මනුස්සයාගේ ඇස් දෙක නළලට ගියා. 
උණුසුම් තේ කෝප්පයකින් සප්පායම් වූ අපි නැවත ගමන් අරඹා හැටන් නගරයට පිවිසුණා. හැටන් නුවරඑළිය මාර්ගය ඒ වන විට පිළිසකර කෙරෙමින් පැවතුණ නිසා අවට පැවතුණේ අධික දුහුවිල්ලක්. මෙසේ මද දුරක් පැමිණි අපි ශ්‍රී ලංකාවේ පිහිටි අතිශය සොඳුරු දිය ඇල්ලක් වන "ඩෙවොන් ඇල්ල" සමීපයට එළඹියා. 

ඩෙවොන් ඇල්ල

 මහා මාර්ගයේ සිට හොඳින් නැරඹිය හැකි මේ දිය ඇල්ල උසින් අඩි 281ක්.

ඩෙවොන් ඇල්ල වඩා සමීපව

ඩෙවොන් ඇල්ල පසුකර මීටර කිහිපයක් ඉදිරියට ගමන් කරන විට "ලංකාවේ නයගරාව" යන අන්වර්ථ නාමයෙන් හැඳින්වෙන "ශාන්ත ක්ලෙයාර්" දිය ඇල්ල මුණ ගැහෙනවා.  

"ශාන්ත ක්ලෙයාර්" දිය ඇල්ල

ඉහළ කොත්මලේ ජල විදුලි ව්‍යාපෘතිය නිසා දැන් නම් මේ ඇල්ල මෙතරම් සුන්දරව දකින්නට ලැබෙන්නේ නෑ.

"ශාන්ත ක්ලෙයාර්" දිය ඇල්ල සහ පහත නිම්නය

මේ තියෙන්නේ එන අතරමග දැකපු තවත් කුඩා දියපහරක්. මේක ඇත්තටම දිය ඇල්ලක් නෙවෙයි. මේ දියපහරට ඉහළින් ඇති මාර්ගය හරහා දාපු බටයක් තුළින් තමයි මේ දියපහර මතුවෙන්නේ. ඒ නිසා මම ඒකට නම දැම්මා "බට ඇල්ල" කියලා..... 

"බට ඇල්ල"

මේ විදිහට පරිසරයේ සුන්දරත්වය උපරිමයෙන් විඳිමින් අපි නුවරඑළිය නගරයට ළඟා වුණා. අපේ නවාතැන්පොළ වුණේ රජයේ සංචාරක බංගලාව. දුප්පත් රාජ්‍ය සේවකයන් වන අපිට ඒකෙ තියෙන පහසුකම් ඉහටත් උඩින්.

මේ තියෙන්නේ නුවරඑළියේ රජයේ සංචාරක බංගලාව

එදා හවස අපි ගත කලේ ග්‍රෙගරි වැව් ඉවුරේ ඇවිදිමින් සහ බයිසිකල් පදිමින්. මේ තියෙන්නේ ග්‍රෙගරි වැව් ඉස්මත්තේ සොඳුරු දසුන් කීපයක්. 

ග්‍රෙගරි වැව

ග්‍රෙගරි වැව

ග්‍රෙගරි වැවට ඉහළින් හිරු බැසයන අයුරු...

හෝටන් තැන්නේ හා අඹේවෙල තොරතුරු ඊළඟ ලිපියෙන් බලාපොරොත්තු වෙන්න.
තවත් අපූරු බයිසිකල් චාරිකාවක විස්තර මෙතනින් බලන්න. http://ekicks.blogspot.com/2013/02/01.html

යතුරුපැදි චාරිකා.. අංක 1: නුවරඑළිය

අද මම ලියන්නේ මීට අවුරුද්දකට පමණ පෙර ගිහිපු මගේ ජීවිතේ කවදාවත් අමතක නොවන විදිහේ සොඳුරු චාරිකාවක් ගැන. මම මගේ බොහෝ  බිමන් වලට යොදා ගන්නේ මෝටර් බයිසිකලය. එකෙන් ගමන් බිමන් යද්දී දැනෙන අපූරු නිදහස වෙන කිසිම වාහනයකින් ලබන්න බෑ. හැමදාම  ළඟ පාත ගමන් බිමන් යන එකේ මට හිතුනා දවසක බයිසිකලෙන් දුර ගමනක් යන්න. ඉතින් අපි ගමනාන්තය හැටියට තෝර ගත්තේ නුවරඑළිය. හැමදාමත් මගේ ජීවන ගමනේ සහකාරිය වෙච්චි මගේ ආදරණීය බිරින්දෑත් මාත් එක්ක මේ ගමනට එකතු වුණා. අපි හික්කඩුවෙන් ගමන පටන් ගත්තේ හවස දෙකට විතර. හවස පහමාරට විතර කඩුවෙල අපේ ඥාතියෙකුගේ නිවසට ළඟා වූ අපි එදින රාත්‍රිය එහි ගතකලේ පසුදා උදෑසනින්ම ගමන පිටත් වීමට අදිටන් කරගෙනයි.
සැලසුම පරිදිම එදින උදෑසන 4.30ට පමණ කඩුවෙලින් පිටත් වුනු අපි අවිස්සාවේල්ල හරහා කිතුල්ගලට ළඟා වුණා.

කිතුල්ගලට ඉහළින් හිරු උදාව.

කිතුල්ගලට ඉහළින් හිරු උදාවන දර්ශනය නම් අමතක නොවන තරම් සුන්දර දර්ශනයක්. ඒ මිහිරියාව විඳිමින් කැළණි ගං ඉවුරේ ඉදිවුණු පුංචි හෝටලයකින් අපි උදෑසන ආහාරය ලබා ගත්තා.

උදේ කෑම හරී වැදගත්!

ඊට පස්සේ බයිසිකලේ එහෙමම තියෙද්දී ගං ඉවුරට ගිහින් පොඩ්ඩක් ඒ සුන්දරත්වය විඳ ගන්නත් අපි අමතක කලේ නෑ.

කැළණි ගං කොමළිය 

මේ අපූරු සලබයා මුණගැහුනේ ගං ඉවුරේ පොඩි ගහක වහලා ඉන්දැද්දි. එයාගේ තටුවකට යම් විලොපිතයෙකුගෙන් ප්‍රහාරයක් එල්ල වෙලා තියෙන බව පේන්න තිබුණා.

තටු බිඳුණු සලබයා...

එතනින් පිටත් වුනු අපි නැවතත් අපේ චාරිකාව පටන් ගත්තා. අපිට ඇත්තටම කිසිම හදිස්සියක් තිබුනේ නෑ. ඒකනිසා අවට සුන්දරත්වය නරඹමින් අපි හෙමින් හැටන් පාර දිගේ ඉදිරියට ආවා. කිතුල්ගල පහුකරලා කිලෝමීටර් හතරක් විතර එනකොට හඟරාපිටිය හරහා නොර්ටන් බ්‍රිජ් වලට යාහැකි අතුරු පාරක් අපිට හමුවුණා. මේ හන්දිය හැඳින්වෙන්නේ කළුගල හන්දිය කියලා.(තොරතුරු සැපයූ චම්ලි කරුණාසේකර සහෝදරයාට ස්තූතියි.) මම වහාම සිතියම ඇදලා බැලුවා. මේ පාර තරමක් දුෂ්කර දිගු මාර්ගයක් වුණත් අතිශය සොඳුරු සප්තකන්‍යා කඳු පාමුල හරහා දිවෙන්නක් නිසා දෙවරක් නොසිතාම අපි ඒ පාරට හැරුණා.

දුෂ්කර නමුත් මා මෙතෙක් ධාවනය කළ සොඳුරුම මාර්ගය  

මම කලිනුත් කිව්වා වගේ මේ පාර දිවෙන්නේ සප්ත කන්‍යා කඳු පාමුලින්. මේ තියෙන්නේ කොත්තැල්ලෙන කියන සුන්දර ගම. 

කොත්තැල්ලෙන ගමේදී. පසුබිමින් පෙනෙන්නේ සප්තකන්‍යා කඳු වැටියේ කොටසක්.

මේත් කොත්තැල්ලෙන ප්‍රදෙශයමයි. 

මේ විදිහට වටරවුම් ගහමින් හිතූ හිතූ තැන් වල නතර වෙමින් ආපු අපි අන්තිමට නොර්ටන් බ්‍රිජ් නගරයට ආවා. සෙස්ස ඊළඟ පෝස්ට් එකෙන් බලාපොරොත්තු වන්න.

දෙවැනි කොටස මෙතනින්.

හොඳටම වැඩිවුණ ලේනා....

ලේනා..Indian Palm Squirrel (Funambulus palmarum)

අපේ මිදුලේ කුරුල්ලන් වෙනුවෙන් කෑම, වතුර සපයන ලැල්ලක් සවි කරලා තියෙන බව මම කලින් පෝස්ට් එකක කියලා ඇති. මෙතනින් බලන්න ඒක. අපි පසුගියදා කුරුලු ලෑල්ලට පොඩි ස්ථාන මාරුවක් දුන්නා. කලින් තිබ්බ තැන චුට්ටක් පාත වැඩියි. ඉතින් පූසෝ වගේ විලෝපිතයන්ගෙන් කුරුල්ලන්ට ඇතිවන අවදානම සලකලා අපි කුරුලු ලෑල්ල ඇඹරැල්ල ගහේ ටිකක් උඩින් හයි කළා.
මේ වෙනස කල දවසේ වෙනදා එන කුරුල්ලෝ වැඩිය ආවේ නෑ. උන්ට තැන නුහුරු නිසා වෙන්න ඇති. හෙට අනිද්දා වෙනකොට ඒක හරියයි. එදා මුලින්ම කෑමට ආපු මේ තුන් ඉරි අප්පු මූණ දීපු අබග්ගය තමයි මේ.

ආ... මේ තියෙන්නේ රස කෑමක්.... කිට්ටු කරලා බලමු....

ලෝකෙ තියෙන අන්තිම කෑම මේක වෙන්න බැරි නෑ ඒක හින්දා හොඳට කන්න ඕන.  

තවත් කාගන්නත් බෑ ඒත් බෑ කියලත් බෑ.....

අන්තිමේදී....

කන්න දීපු එවුන් මාව නැගිට්ටවපල්ලා....