Monday, February 20, 2017

Let's Travel Around Sri Lanka - එන්න.. අපි ඇවිදිමු...


ඇවිදීම... එහෙම නැත්නම් සංචාරය අපි කවුරුත් කැමති විනෝදාංශයක්. නමුත් යන්නන් වාලේ ට්‍රිප් යන්නේ නැතුව අවබෝධයෙන් සහ නිසි අධ්‍යයනයකින් යුතුව ගමනක් සැලසුම් කර ගත්තොත් පමණයි එහි නියම තෘප්තිය විඳින්න පුළුවන්.  නැත්නම් ඉතිං “ට්‍රිප් එකක් ගියා මෙලෝ රහක් නෑ" කියන්න තමයි වෙන්නේ... එහෙනම් අද සොබාරූ තුළින් මාත් එක්ක යමු ට්‍රිප් එකක්... හොඳට ප්ලෑන් කරලා කල්යල් බලලා එහෙම...

01. කොහෙද යන්නේ....

මෙන්න මේක සෑහෙන වැදගත් ප්‍රශ්නයක්. හැමදාම යන කතරගම, නුවරඑළිය වගේ තැනකට යනවද නැත්නම් වැඩිය අහල නැති දුෂ්කර නමුත් සුන්දර පෙදෙසක සංචාරය කරනවද? මේක තීරණය කරන්න කලින් ඔබ එක්ක යන පිරිස ගැන අවධානය යොමු කරන්න. කාන්තාවන්, ළමයින් සමග යන පවුලේ චාරිකාවක් නම් දුෂ්කරතාවයෙන් අඩු සුවපහසු ගමනක් තෝරා ගැනීම යහපත්. නමුත් ඔබ වඩාත් කැමති දුෂ්කරතා විඳිමින් එපමණටම සොබාදහම විඳිමින් සංචාරය කරන්නට නම් මගේ මේ ලිපිය ඔබ වෙනුවෙන්...
ඇතැම් විට එවන් සොඳුරු තැන් ඔබ අවටම සැඟවී තිබෙන්නටත් පුළුවන්. මා ගිය මේ චාරිකාව මගේ නිවසේ සිට කිලෝමීටර දහයකටත් අඩු දුරකිනුයි පිහිටා තිබුණේ...  මාදම්පා ගඟ චාරිකාව
එබැවින් චාරිකාවක් යන්නට සැලසුම් කරද්දී සම්මත රාමුවෙන් බැහැරව මදක් සිතන්න. ඔබ අවටින්ම අපූරු චාරිකා අන්තයන් හමු වේවි.

02. කා එක්කද යන්නේ?

යන්නේ කොහේද වගේම යන්නේ කා එක්කද කියන එකත් සැලකිල්ලට ගත යුතුම කරුණක්... ඔබ සැලසුම් කරන්නේ ඉතා දුෂ්කර චාරිකාවක් නම් ඊට සහභාගි වන්නන් ඒ සඳහා ශාරීරිකව සුදුසු අය විය යුතුයි. අතරමග යා ගන්නට නොහැකිව නතර වන එක් අයෙක් නිසා ඔබේ මුළු චාරිකාවම අසාර්ථක වන්නට ඉඩ තිබෙනවා. ඒ වගේම යන ගමනේ දුෂ්කරතා විඳගන්නට සියල්ලන්ම එකා මෙන් එකඟ විය යුතුයි. රළුව සකස් කරගන්නා ආහාරයකින් තෘප්ත වන්නටත්, ගල් පොත්තක් මත හෝ රාත්‍රිය පහන් කරන්නටත් හැකි අය පමණක් ගමනට සම්බන්ධ කර ගන්න. එමෙන්ම තමන්ගේ මෙන්ම අනුන්ගේත් ජීවිත අවදානමේ හෙළමින් ගොං ආතල් ගන්නට ලෑස්ති වෙන අය එක්ක නම් ගමන් යන්නට එපා... අනතුරුදායක ලෙස ගල්මත නගිමින් බෑවුම් වල සිට ගනිමින්, දියඇලි ආසන්නයට යමින් සෙල්ෆි ගසන්නට දඟලන අඳබාලයන් හලා යෑම ඉතාම ගුණදායක විය හැකියි.

03. කොයි කාලයේද?

ඔබ යන්නට අදහස් කරන ප්‍රදේශය අනුව කිනම් කාලයේ දැයි තීරණය කිරීම වැදගත්. ඇතැම් ප්‍රදේශ වලට වියළි කාලයේ යෑම එතරම් සාර්ථක නොවන්නට පුළුවනි. දියඇලි, දියපහර වල මනා සුන්දරත්වයත් අවට පරිසරයේ හරිතවන් පළා පැහැයත් විඳින්නට නම් වඩාත් සුදුසු වන්නේ වැසිකාලයක් බව අමුතුවෙන් කියන්නට ඇවැසි නෑ..
නමුත් ඇතැම් පෙදෙස්වල වැසි සමයේ චාරිකා කිරීම ඉතා අනතුරුදායක විය හැකියි. එසේම මහවැස්ස නිසා ඔබේ ගමනාන්තයට ළඟාවීම කළ නොහැක්කක් වීමටද ඉඩ තිබෙනවා. මේ බලන්න මහ වැස්සේ එල්ජින් ගිහිං අපට වෙච්චි දේ.. 

04. මොකද කරන්නේ? මොනවද ගෙනියන්නේ?

සංචාරකයන්ට තිබෙන ඊළඟ ගැටලුව තමයි ගෙනියන්නේ මොනවාද? කොහොමද ගෙනියන්නේ කියන එක. දුෂ්කර පෙදෙසක චාරිකා කරන ඔබ ගෙන යා යුතු දෑ ඉතා සැලකිල්ලෙන් සැලසුම් කළ යුතු වෙනවා. හුදෙකලා කැලෑබද පෙදෙසකදී ඔබට අවශ්‍ය කිසිවක් මිලදී ගන්නට පහසුකම් නැති නිසා ඇවැසි සියලුම දේ ගෙන යා යුතුයි. නමුත් කැලෑ අස්සේ ගස්ගල් මැදින් යන ගමනේදී ඔබේ සැහැල්ලුව වචනාර්ථයෙන්ම සැහැල්ලු විය යුතුයි. එබැවින් ඔබේ බැක්පැක් එකේ තිබිය යුත්තේ අත්‍යවශ්‍යම දෑ පමණයි.
1. කූඩාරම - ඔබ කඳවුරු බඳින්නට සූදානම් නම් හොඳ තත්ත්වයේ සැහැල්ලු කූඩාරමක් ගෙනයා යුතුයි. 
2. ජලය - ඔබ යන ප්‍රදේශය අනුව ගෙන යා යුතු ජල ප්‍රමාණය තීරණය වනවා. වියළි පෙදෙසක නම් වැඩි ජල ප්‍රමාණයකුත්, ඔබ චාරිකා කරන පෙදෙසේ ස්වභාවික ජල මූලාශ්‍ර තිබේ නම් අඩු ජල ප්‍රමාණයකුත් ගෙන යන්න. මෙය කලින් සොයා බලා තහවුරු කර ගැනීම අත්‍යවශ්‍යයි.
3. කැමරා උපකරණ - මට නම් ගමනේ වැදගත්ම වන්නේ මේ ටික... මේවා වතුරෙන් පරිස්සම් කර ගැනීම වැදගත්
4. පෞද්ගලික සනීපාරක්ෂක දෑ - ඇඳුම් පැළඳුම් නම් අවම ප්‍රමාණයක් ගෙන යාමයි සුදුසු. නමුත් යට ඇඳුම්, බෙහෙත් ද්‍රව්‍ය ආදිය ප්‍රමාණවත් ලෙස සපයා ගන්න.
5. මේ සියල්ල මනාව අසුරාගෙන දෑත නිදහස්ව ගමන් කළ හැකි විශාල ප්‍රමාණයේ ශක්තිමත් සුවපහසු ගමන්මල්ලක් අත්‍යවශ්‍යයි. මේවා තරමක් මිලෙන් අධික බවත් කිව යුතුයි.

05. ඇඳුම් පැළඳුම් කොයි වගේද?

ඔබ යන්නේ කැළෑ ගමනක් මිසක් මෝස්තර නිරූපණයකට නොවෙයි. එබැවින් කැළයට උචිත ඇඳුමෙන් සැරසෙන්න. තද වර්ණ ඇඳුම් නිසා ඇතැම් විට කැලෑ සතුන් බිය වැදීමෙන් ඔබට වටිනා ඡායාරූපයක් අහිමි වෙන්නටත් ඉඩ තිබෙනවා. නමුත් අනිත් අතට ඔබ කැලයේ අතරමං වුණු අවස්ථාවක ඔබේ තද වර්ණ ඇඳුම් ඉක්මණින් ඔබව සොයා ගන්නට උපකාරී වෙයි.
හොඳින් සිරුර ආවරණය වන සැහැල්ලු ඇඳුමක් අඳින්න. මැනවින් දෙපා ආවරණය වන සහ සුවපහසුව සලසන සපත්තු යුවළක් පැළඳීම අත්‍යවශ්‍යයි. සර්පයන්ගෙන්, කටු අකුල් වලින් ඔබ ආරක්ෂා කර ගමනේ මිහිරි මතක ඉතිරි කරන්නට එය සමත් වෙයි. යා ගන්නට අපහසු සපත්තු යුවළක් නිසා ඇතැම් විට ඔබේ මුළු ගමනම අමිහිරි එකක් වන්නටත් ඉඩ තිබෙනවා.

06. වනයේ හැසිරීම - 

මෙය නම් ඉතාම තදින් සැලකිල්ලට ගත යුතු කාරණයක්... ප්‍රථම කොට ඔබේ ආරක්ෂාව ගැන දැඩිසේ සැලකිල්ලට ගත යුතුයි. අවදානම් අවස්ථාවකදී ඊට උචිත ආරක්ෂක ක්‍රමවේදයන් අනුගමනය කරමින් කටයුතු කිරීම අත්‍යවශ්‍යයි. අනවශ්‍ය වීරක්‍රියාවන් සඳහා උත්සාහ දැරීම ඔබේත් අන් අයගේත් ජීවිත අවදානමේ හෙළන්නක් බව තරයේ සිහි තබා ගන්න. ඇතැම් විට අනතුරක් සිදු වුව හොත් මිනිස් වාසයක් කරා ඒමට බොහෝ වේලාවක් ගත වෙන්නට පුළුවන්. එවිට ඔබට අත්වන ඉරණම අමුතුවෙන් කිවයුතු නැහැ.
අනිත් අතින්, වනය ඔබේ නොවන බවත් ඔබ එහි අමුත්තෙකු බවත් හොඳින් සිහියට ගන්න. මත්පැන් බී කලහ කරන්නටත්, කෑකෝ ගසමින් ගී ගයමින් ‘ආතල්' ගන්නටත් උවමනා නම් ඊට සුදුසු තැනකට යන්න. වනගත පෙදෙසක් ඊට උචිත නෑ..
වනසතුන්ගේ ඡායාරූප ගනිද්දී උන්ට හානි නොවනසේ හැසිරෙන්නට වගබලා ගන්න. සතුන් පසුපස පන්නමින් ෆොටෝ ගැසීම ඉතා අනුචිත වැඩක්. ඉතා කුඩා හා සංවේදී සතුන් (ගෙම්බන් වැනි) වෙත බොහෝ සමීපව ෆ්ලෑෂ් දැල්වීම නොකරන්න. ඔබට එය එක ඡායාරූපයක් වුණත් ඒ එම සතාගේ මුළු ජීවිතේ... කුරුළු කැදලි වලට සමීප වෙමින් ඡායාරූප ගැනීම එම සතුන්ගේ ජීවිත අවදානමේ හෙළීමක්... පැළෑටි ආදියේ සේයාරූ ගැනීමේදී ඒවා තිබෙන තැනම තිබියදී පින්තූර ගන්න. දුර්ලභ උඩවැඩියා ශාකයක් නිවැරදි ආලෝකයෙන් ඡායාරූප ගත කිරීම සඳහා එය ලීයකින් ඇන බිම දමා පහසු තැනකින් තබා පින්තූර ගත් ‘ක්ෂේත්‍රයේ ප්‍රවීණයෙක්‘ ගැන මා අසා තිබෙනවා.
එමෙන්ම ඔබ වනයේ ගමන් කරද්දී පා තබන්නේ කොතනට දැයි ඉතා සැලකිල්ලෙන් පසුවීම වැදගත්. ඇතැම් විට දඩයක්කාරයන් ඇටවූ මරඋගුල් තිබෙන්නට පුළුවනි. 
මේ සියලු කරුණු සැලකිල්ලට ගෙන මිහිරි මතක පමණක් ඉතිරි වෙන චාරිකාවක් සඳහා එහෙනම් පිටත් වෙමු.

(මා මේ කරුණු ලීවේ මගේ අත්දැකීම් ඇසුරෙන්... මට මගහැරුණු දෑ සහ ඔබේ වෙනත් වටිනා යෝජනා පහතින් සටහන් කරන්න)
නැවතත් - ඔබට ඇවැසි ඕනෑම කරුණක් මේ බ්ලොග් අඩවියෙන් උපුටා ගත්තාට කිසිම අමනාපයක් නැත.

21 comments:

  1. ඉතාම වැදගත් දේ තමයි බොරු ෂෝ දාන්න ගිහිල්ල තමංගෙ ජීවිතෙයි අනුංගෙ ජීවිතයි අමාරුවෙ දාන්න පුලුවං අය හලල යන එක.
    හොඳ තොරතුරු ටිකක්.

    ReplyDelete
    Replies
    1. ඇත්තටම ප්‍රසා ඒ වගෙ එකෙක් හිටියොත් ඇති මුලු ගමනටම කෙලවෙන්න

      Delete
  2. ඔබට ඇවැසි ඕනෑම කරුණක් මේ බ්ලොග් අඩවියෙන් උපුටා ගත්තාට කිසිම අමනාපයක් නැත.
    මට උබගේ ලිපිය තරමටම මේ කොටස වැදගත්
    හිස් අහසේ සදරු ගේ බ්ලොග් එකෙන් පස්සේ මේක දැක්කේ උබගේ

    ReplyDelete
    Replies
    1. මම මේක ලියන්නෙ කවුරුම හරි ප්‍රයෝජනයට ගනියි කියලා හිතාගෙන. ඉතින් ඒකට රෙස්ට්‍රික්ශන්ස් දාන්න මම කැමති නෑ. උඹ නිසාමයි මේ ලියවෙන්නෙ. තෑන්ක්ස් මෙන්ඩයියා

      Delete

  3. එල ද බ්‍රා මෙන්ඩාJanuary 14, 2017 at 11:57 AM
    තව එකක් ලියමු
    නෙලුම්යයේදී සෙට් වෙමු
    උබ සම්මානේ ගන්න වෙලාවට පුටුව උඩ නැගලා විසිල් එකක් ගහනවා

    ReplyDelete
    Replies

    DilshanJanuary 14, 2017 at 9:57 PM
    ලියන්න දෙයක් නෑ බං... කොහෙවත් යාගන්න බැරිවුණා මේ ටිකේ...
    මට මොන සම්මානද බොලේ.... නෙලුම්යායට අනිවාර්යෙන් මේ පාර එනවා... අනිවාර්යෙන් සෙට් වෙමු...


    එල ද බ්‍රා මෙන්ඩාJanuary 15, 2017 at 8:05 PM
    පලයන්න ...උබ සොබාදහම එක්ක ජිවත් වෙන එවුන් ...උබලට ලියන්න දේවල් ඕන තරම් දේවල් තියනවා ...
    ලියපිය අපි වෙනුවෙන් නෙමයි අපේ ළමයි වෙනුවෙන්
    උබලගේ හැකියාවන් අත්දැකීම් උබලට වඩා වටින්නේ හෙට උපදින අපේ ළමයින්ට

    Delete

    DilshanJanuary 16, 2017 at 9:32 AM
    හෙහ්... හිටිං හිටිං මක්කා හරි ලියන්නං

    බලපන් මම බොරුද කියන්නේ කියලා
    උබලට ලියන්න මොනතරම් දේ තියනවද

    ReplyDelete
    Replies
    1. ඇත්ත... ඇත්ත ලියන්න දේ බොහෝමයි... කාලය අවමයි...

      Delete
  4. තද වර්ණ ඇඳුම් අදින්න එපා කියලද කියන්නේ කැලේ යනකොට

    ReplyDelete
    Replies
    1. කැලෑව ගැන හොඳ දැනුමක් ඇතුව, සත්තු බලන අදහසින්ම යනවා නම් අඳුරු පාට ඇඳුම් හොඳයි.
      නමුත් නාඳුනන කැලෑවක යන ගමනකදී කැපී පෙනෙන වර්ණ සහිත ඇඳුමක් ඇඳලා හිටියොත් අතරමං වෙච්ච වෙලාවක සහන කණ්ඩායම් වලට ඔබව සොයා ගැනීම පහසුයි.

      Delete
  5. මම දවසක උබව මගේ හොටෙල් ගෘප් එකේ ට්‍රිප් ඇඩ්වයිසර් විදිහට ගන්නවා (ලොකු හොටෙල් ගෘප් එකක් දැමොත්)

    ReplyDelete
    Replies
    1. අම්මට සිරි... ඉක්කන්ට දාපං හොටෙල් ගෘප් එක...

      Delete
  6. මේ ලිපිය මගේ පංතියේ එවුනට බලන්න රෙක්මන්ඩ් කරා

    ReplyDelete
  7. ඇයි යකෝ මට උබගේ බ්ලොග් එක පැත්තේ නෑවිත් ඉන්න බැරි

    ReplyDelete
    Replies
    1. දිගටම වරෙං මගෙ දෙයියෝ...

      Delete
  8. කැමරා උපකරණ පරිස්සම් කර ගන්න අර කුණු දාන පොලිතින් කවර හොඳයි...
    එක වර කඩා හැලෙන වැස්සකදී ඒක හොඳ ඔප්ෂන් එකක්...
    සිංහරාජේ වගේ දිහාකදී මාර වැදගත්...

    ඊට අමතරව වැසි වනාන්තරයකදී කූඩළු ප්‍රහාර වලින් බේරෙන්න "කූඩළු මේස්" දාගෙන යන එකත් වැදගත්...

    ReplyDelete
    Replies
    1. ලොකු මු එක්ක හරි හරියට මේ වගේ ලිපි ලියන්න පලුවන් එකෙක් උබ ලියන්නේ නැති එක අපේ අවාසනාව

      Delete
    2. ලොකු - කුණු දාන පොලිතින් කවර හොඳ ඔප්ෂන් එකක්... අපි ඇලිහත යද්දි අරං ගියා... ස්තූතියි හොඳ අදහසක් මතුකළාට...
      මං කවදාවත් කූඩළු මේස් දාලා නෑ කියහංකො.. කූඩැල්ලෝ දැං නිකං ජීවිතේ කොටසක් වෙලා...:D
      හැබැයි සිංහරාජෙ වගේ යද්දි නම් කූඩළු මේස් දාන එක හොඳයි. නැත්නම් කූඩැල්ලො අයින් කරනවට වඩා වැඩක් නැති වෙනවා
      මෙන්ඩා - සිරාවට මචං... ලොකුවගේ මාදෙයියාවයි කළු කොටියයි තමයි මට අල්ලලම ගිය ආටිකල් එක. මූටත් වද දියංකො ලියන්න ලියන්න කියලා

      Delete
    3. ඔන්න බලපන් මේ මාසේ ඇතුලත ලොකුට කියලා ලිපියක් ලියෙව්වේ නැත්නම් ....

      Delete
    4. උඹට කියන්න මමත් කවදාවත් "කූඩළු මේස්" දාල නැහැ බං, අපි පොඩි කාලේ කූඩැල්ලෝ අල්ලගෙන නොපිට ගහපු සහ ගැට ගහපු එවුන් වෙච්චකොට මොන අවුලක්ද...

      ලියන්න වෙලා නැහැ මචංලා...
      කම්පැණියෙන් වැඩ වගයක් බාර දීල නිදහස අවම වෙලා යකුනේ තියෙන්නේ...
      මෙන්ඩෝ, බාගෙට ලියපු ඒවා තියෙනවා බං සෑහෙන්න, කොහෙද ඒවා පිළිවෙලක් කරල දාන්නවත් වෙලාවක් නැහැ...

      Delete
    5. ඇත්ත ලොකු... වැඩ අස්සෙ හිර වුණාම කිසිදෙයක් ලියා ගන්න මානසික නිදහසක් නෑ...
      මටත් ටික කලකට ලියන්න වෙන්නෑ... මගෙ කැමරාවට කෙළ වෙලා ඉන්නේ
      දැං මං හරියට හෙණ්ඩුව නැති ඇත්ගොව්වා වගේ, නයා මැරිච්ච පනික්කියා වාගේ, අශ්වයා මැරිච්ච කව්බෝයි වගේ කොටින්ම කිව්වොත් බ්‍රා එක අතේ නැති මෙන්ඩා වගේ....

      Delete
  9. හොඳ පෙළ ගැස්මක් දහිත වැදගත් පෝස්ටුවක් ස්තූතියි!

    ReplyDelete